Das hat ka Goethe g'schrieb'n

Aus Wienerlieder Wiki

"Zur blonden Resi sagt der Drechsler Franz:
'Hörst, Schatzerl, i bin in di' wurlert ganz,
geh leg dein Pratzerl in mein' Hand hinein,
und in ein' Monat wirst du g'heirat' sein,
wann mir a nix als wia a Kammerl hab'n,
so ruch'n ma halt a bisserl näher z'samm',
wann nur die Herzen schlag'n in Einigkeit,
das Andere gibt si' mit der Zeit!'"

Refrain

"Ja, ja, das hat ka Göthe g'schrieb'n, das hat ka Schiller dicht',
's is von kein' Klassiker, von kein' Genie,
das is a Wiener, der zu aner Wien'rin spricht,
und 's klingt halt doch so voller Poesie!"

"Der Sohn will fort, da sagt der Vater ihm:
'Hörst, Pepi, die Idee ist wirklich schlimm,
geht a bei uns sehr viel aus Rand und Band
so bleibt's do' allweil unser Vaterland;
bedenk, wann in der Fremd' du gehst zur Ruah,
druckt dir kan anz'ger Freund die Augen zua,
der Vogel is sein Leb'n a schlimmer gast,
der was sein Nest so leicht verlaßt!'"

Refrain

"Ja, ja, das hat ka Göthe g'schrieb'n, das hat ka Schiller dicht',
's is von kein' Klassiker, von kein' Genie,
das is a Österreicher, der vom Herzen spricht,
und 's klingt halt doch so voller Poesie!"

"Es bet' a Kind, dem d'Muatter krank word'n is:
'Du lieber Himmelvater, waßt es g'wiß,
drum bitt' i gar schön, als braves Kind,
geh laß mein Muatterl wieder aufstehn g'schwind,
i gib dir nachher herzli' gern dafür,
mei' Puppen und das ganze Kuchelg'schirr,
was mir das Christkindl hat dösmal 'bracht,
wannst mir die Muatter g'sund hast g'macht!'"

Refrain

"Ja, ja, das hat ka Göthe g'schrieb'n, das hat ka Schiller dicht',
's is von kein' Klassiker, von kein' Genie,
das is a Kinderl, was mit seinem Herrgott spricht,
und 's klingt halt doch so voller Poesie!"

"'s redt auf der Gassen recht a armer Mann,
An' Anderen stad um a Almosen an,
da lacht der drauf und sagt: 'Mein lieber Herr,
zwa Sechserln hab' i und kan Kreuzer mehr;
da hab'n S' das Ane, 's is die Hälfte grad,
damit a Jeder 's gleiche Nachtmahl hat,
und geht's ma morg'n a grad wia Ihna so,
aber ehrli' theilt hab' i halt do'!'"

Refrain

"Ja, ja, das hat ka Göthe g'schrieb'n, das hat ka Schiller dicht',
's is von kein' Klassiker, von kein' Genie,
das is a Wiener Herz, das zu der Armuth spricht,
und 's klingt halt doch so voller Poesie!"